Vir die bergfietsryer – van die fiksheidsfraat tot die gewone besoeker – is dit moontlik om die veldpaadjies en menige rantjies op die plaas te verken. Meer as 60 km van die pragtigste veldtonele is te sien. Fietse is op die plaas beskikbaar.

Daar is ook 8km-, 18km- en 45-kilometerroetes vir vierwielmotorfietse

Sterrekyk kom net in die Karoo waarlik tot sy reg! Te danke aan baie min kunsmatige lig en geen lugbesoedeling in die omgewing nie, bied ons gastehuis die perfekte geleentheid om te leer van die seë op die maan, verskeie konstellasies, hemelpatrone en die sterre in die algemeen. Met ons 114mm-Newton-weerkaatsingteleskoop op die plaas, het die hemelruim vir ons maar min geheime! Kom besigtig die Skerpioen in September tot die Suiderkruis in die hart van die Melkweg in die winter!

Argeologie. Die Karoo is bekend vir sy rots- en fossielgesteentes en ons plaas is geen uitsondering nie. Daar is binne loopafstand van die gastehuis goeie sedimentêre gesteentes, harde- en lae rotsgesteentes waar die amateur argeoloog en die fossielversamelaar na hartelus kan verken.

Perdry. Perde word meestal op die plaas gebruik om skaap aan te keer en besoekers is welkom om soggens die herders met hierdie taak te help. Die plaas beskik oor meer as 60 km paaie wat met perde verken kan word of gebruik kan word om piekniek in die veld te gaan hou.

Wildbesigtiging kan gedoen word vanaf die omgewing van die gastehuis wat uitkyk oor die hoofkamp van die 1 000 ha, langs die staproete of deur die georganiseerde wildrit. Elf inheemse spesies (eland, rooihartbees, springbok, blesbok, gemsbok, swartspringbok, wit blesbok, blouwildebees, volstruis, rooibok en bergrietbok) word op die plaas aangetref en die wakker kyker sal selfs van die kleiner en skamer diere raaksien.

Voëlkyk kan letterlik vanuit die slaapkamers, die balkonne en die stoepe van die gastehuis gedoen word, of as u verkies, op die staproetes. Tot dusver is 143 voëlsoorte in die omgewing geïdentifiseer. Besoekers kan broeipatrone en rusplekke verken en neste identifiseer. Vir die ware entoesias kan ‘n rit op die Oranjerivier gereël word vir verdere
voëlkykbesigtiging. Daar is ook ‘n voëlkykvoetslaanpaadjie om te stap. 

Voetslaan is moontlik op die plaas. Die wildrit slinger ongeveer 8 km deur die groot wildkamp oorlaai met asemrowende uitsigte van die koppie af, verby ‘n fontein en stroompie waar ‘n laat middagete bedien word. Vervoer terug is beskikbaar. Die voëlvoetpad kronkel vir ongeveer 7 km deur die bosse, langs ‘n stroompie verby tot by ‘n dam, waar voëls volop is. Ook hier word ‘n laat middagete bedien. Met vervoer terug.

Ritte na verskeie plekke kan onderneem word omdat die gasteplaas so strategies gerieflik geleë is. Besoek Philippolis vir sy besondere historiese erfenisse en argitektuur. Ry Gariepdam toe en reël ‘n besoek binne-in sy reuse-wal. Besoek die Anglo-Boereoorlog-begraafplaas te Norvalspont. Of wat van die ander wildreservate by Tussen-die-Riviere, Doornkloof of by die Gariepdam. By die Dam is ook ‘n nege putjie gholfbaan.